Ministri i Brendshëm i Kosovës, Xhelal Zvelça ka folur për rrëmbimin e tre efektivëve të policisë së Kosovës një ditë më parë.
Në një konferencë të përbashkët me kryeministrin Albin Kurti ai deklaroi se nuk e dinë se ku po mbahen efektivët duke theksuar se Serbia është një vend jo demokratik që nuk brengoset për të drejtat e të burgosurve dhe as për familjarët e tyre.
“Po zhvillohen hetime mbi të gjitha faktet e gjetura në terren. Dëshmitë janë të mjaftueshme se ka qenë një operacion i mirë organizuar i njësive speciale. Në zonat kufitare cilido shtet mund të ndërmarrë hapa të tillë kundër shtetit tjetër. Nuk është diçka e paarritshme. Por për vendet demokratike janë të papranueshme. Nuk dimë ku po mbahen policët tanë, Serbia është një vend jo demokratik dhe nuk brengoset fort as për të drejtat dhe liritë e të burgosurve, as për familjarët e tyre dhe as për fqinjësi të mirë. Këto situate janë duke u ndarë në vazhdimësi me partnerët tanë. Kishte edhe pjesëtarë të KFOR që hetonin rastin. Sa i takon terrenit të dhënat përputhen. Gjurmët tregojnë se ky ka qenë një aksion i dy njësive speciale në numër shumë të madh se sa ju keni parë.
Gatishmëria në radhët e policisë është rritur. Ekziston një vijë e gjatë që ndan dy shtetet. Ne po bëjmë maksimumin që e me kapacitetet që kemi të sigurojmë që vija kufitare është e paprekur. Përgjegjësia është mbi të gjitha e KFOR-it. Presim të dalin publikisht me qëndrimet e tyre lidhur me atë që ka ndodhur. Unë besoj se do të jemi të gatshëm t’i përgjigjemi çfarëdo sfide”.